Fryske Skriuwster, Organisator Diele fan it Waad
Se is yn 1998 berne yn Stienwyk en hat har jeugd yn Rie trochbrocht. Sylke studearre sosjaal wurk yn Ljouwert en is drok dwaande mei fierdere ûntwikkelingen yn har fakgebiet. Har ûnderfinings yn ‘e persoanlike begelieding binne in ynspiraasje foar har fersen. De wrakselingen dy’t it libben meibringt wol sy fêstpakke, opskriuwe en fierder útplúzje. Faak skriuwt sy oer dit soarte besteanswrakselingen en mei in holistyske fyzje besiket se oaren te motivearjen en te ynspirearjen ta ferbining. De grutste ynspiraasjeboarne foar ferbining fynt se tichtby hûs: it lânskip, it Waad. Sûnt 2024 is Sylke aktyf as mei-projektorganisator fan Diele fan it Waad, in jierliks poëzijprojekt wêryn’t de ferbining tusken minsk en lân ta utering brocht wurdt.
Earne hjir
Earne hjir haw ik
Wjukwylde wurden foar fûgels
Dûkeltsjedraaiers
Sweefswalkers
Wyndûnsers
Smeltswiete wurden foar myn leafdes
Hertefjoerkes
Leaveleafstelingen
Sielestrielers
Gleongleie wurden foar rûkersguod
Fearrefachtwurden foar myn fielen
Leaflangjende wurden foar it langstme
Ferealdreame kin ik
My wuolje yn trieddetinne tekkens fan tinzen
Lidwurdlaitsje, dangelwurddûnsje
Smûksprekke, passyprate
Mar de wrâld wekkert my rûch
Sprekt myn ferkeardferstean
Wurden dy’t tekoart sjitte
Dêr’t gewearen tefolle
Gjin sielestrielers
Gjin wyndûnsers
Gjin ynlibjen foar oerlibjen
Gûlendelûden fan lûdgegûl
Weromwuolje wol ik
Earne hjir
De tekken fan tinkeltinzen yn
Dêr’t fielfertellers de rûchrazers stilstelle
Fröbelfantasij de stikkene siel heilhielt
Dûkeltsjedraaiers dûkelje
Leaveleafstelingen leavje
Dêr
út de bondel:
Fier dyn eigen Taal (Frysk en Frij, 2025)
boarnebea
tarre longen
boarnebea
fertreastende lijte
oan de stoarm foarby
in algeduerich hert
klopjend wylst ûnwis
ûnttei myn izige eagen
suverje myn giftige liif
ferromje myn tinzen
as ik my mei dy ferbyn
myn leech en heech tij
mem fan myn bern
lit my hoedzje
net allinnich
myn fergonklike bestean